Комисијата оценува дека дека трите големи интернет-компании спроведуваат акции да ги исчистат своите платформи од штетно дејствување, спам и неавтентично однесување на нивните корисници, но не е целосно задоволна од напредокот. „Фејсбук“ само од почетекот на годинава има избришано 8 координирани мрежи поради неавтентично дејствување (лажно претставување, спам, лажни вести, итн.) од земји како Северна Македонија, Косово и Русија
Европската комисија вчера објави извештај во кој го оцени напредокот на трите големи интернет-компании „Фејсбук“, „Гугл“ и „Твитер“, во нивната борба против дезинформациите. Овие три компании потпишаа Кодекс на практики и се обврзаа да известуваат еднаш месечно за своите активности на ова поле пред изборите за Европскиот парламент во мај 2019 година.
Комисијата истакна дека ги цени нивните напори за зголемување на транспарентноста пред европските избори, додавајќи дека сите три компании сега означуваат кој стои зад политичките огласи објавени на нивните страници, а „Фејсбук“ и „Твитер“ веќе имаат и библиотеки на сите објавени политички огласи, додека оваа функционалност кај „Гугл“ е во фаза на тестирање.
Сепак, Комисијата оценува дека се потребни дополнителни чекори, особено во насока на објавување на методологијата и сетовите на податоци за лажните профили и страници со цел да им се овозможи на независните експерти, проверувачите на факти и истражувачите да можат да вржат посебни евалуации. Во извештајот се вели и дека „Гугл“ и „Твитер“ немаат остварено никаков напредок на планот на обезбедување на транспарентност во врска со огласите што се однесуваат на прашања од областа на јавниот интерес и јавните политики, а кои влијаат врз важни дебати во текот на изборен период.
Од друга страна, пак, изразено е задоволство што платформите преземаат чекори во борбата против штетните ботови и лажните профили. Особено се истакнува како позитивен чекор соработката со организации и мрежи за проверка на факти од страна на „Гугл“.
Во однос на конкретните активности на овие платформи, Комисијата ги издвојува политиките на „Гугл“ во однос на политичкото рекламирање, кои стапија во сила минатиот месец, како и бришењето значителен број Јутјуб-канали, кои продуцираа спам, измами, користеа измамнички практики и лажно претставување.
„Фејсбук“, пак, е пофален за преземените акции против огласите што содржат неточни содржини или ги заобиколуваат нивните контролни системи. Компанијата извести и дека во првото тромесечје годинава отстрани од својата платформа осум координирани мрежи поради неавтентично однесување (ширење дезинформации, лажно претставување и слично), кои потекнуваат од Северна Македонија, Косово и Русија. „Твитер“, пак, исто така, презеде акции против лажните профили и тие што продуцираат спам, но не објави податоци колку од овие активности се однесуваат на земјите од Европската Унија.
Комисијата длабински ќе ги оценува заложбите на овие три платформи да ги исчистат своите мрежи од штетно и неавтентично дејствување на корисниците во период од 12 месеци до крајот на годинава. Доколку резултатите се покажат незадоволителни, најавени се дополнителни активности, како и донесување законска регулатива која потоа интернет-платформите ќе мора да ја почитуваат.