[Рецензија: КРАХ ВО СДСМ: Петар Атанасов си поднесе оставка од пратеничката функција]
Текстот што го рецензираме се базира врз шпекулации и непроверени информации. Написот е нецелосен и има цел да ја манипулира јавноста и да шири лажни вести.
Линк до оригиналниот напис: КРАХ ВО СДСМ: Петар Атанасов си поднесе оставка од пратеничката функција
Датум и време на објавување: 26.8.2018
Датум на рецензирање: 31.8.2018
Рецензент: Ана Анастасовска
Насловот на написот е сензационалистички. Со самото тоа што се наведува дека настанал „крах во СДСМ“, привлекува внимание и ги тера читателите да го кликнат. Но, внатре во текстот, читателите нема да наидат на цврсти и проверени информации, туку само на шпекулации.
Написот на почетокот пренесува информација дека „Пратеникот Петар Атанасов си поднесе оставка од фунцијата пратеник во собранието на Република Македонија“.
Но, подолу нема објаснување на таквата информација и нема одговор на прашањето: Зошто?
Наместо одговор, на читателот му се понудени шпекулации.
Шпекулациите одат во насока дека тој се противи на Договорот од Преспа и референдумот за промена на уставното име, но повеќе информации ќе имаме во текот на утрешниот ден.
Ако новинарот слушне шпекулации, треба да ги провери, а не само да ги пренесе и да застане таму. Тоа е спротивно на новинарските стандарди. На тој начин се шират лажни вести во јавноста.
Ваквите „шпекулации“ се уште посмешни ако се има предвид дека причината за оставката на Атанасов од пратеничката функција беше позната и ја пренесоа други медиуми. Атанасов беше предложен за заменик-министер за образование и поради тоа мораше да ја напушти функцијата пратеник.
Целиот текст е празен, несериозен, без цврсти и проверени информации. Тој има само една цел, а тоа е ширење лажни вести и манипулирање на јавноста.