Во анонимни текстови, без информации од јавен интерес, украсени со фотографии од луѓе што се преправаат дека се некој друг, се објавуваат непотврдени информации што се однесуваат на одреден случај што има публицитет во јавноста. Сето тоа се случува во време кога онлајн-медиумите заземаат големо место во областа на информациите. Одредени автори не го поминуваат својот текст низ филтрите на новинарските принципи и како резултат на тоа честопати објавуваат дезинформација, со што ја губат довербата кај своите читатели. Веста што ја разгледуваме е еден таков пример.
Линк до написот: Катица Јанева сликана од затворот во Шутка Katica Janeva fotografohet nga burgu i Shutkës
Датум на објава: 10.9.2019
Датум на рецензија: 22.9.2019
Рецензира: Ајнур Бафќари
Наслов што ветува за непроверена фотографија
Текстот што го разгледуваме со бомбастичен наслов за поранешната обвинителка Катица Јанева, што е вест веќе долго време, секако и за авторот бил текст што многу ветува, бидејќи е актуелно прашање и ужива голем интерес. Меѓутоа, предизвикува разочарување кај читателот кога отвора таков текст и за возврат не ги добива ветените информации. Во дадениот текст се вели дека специјалната обвинителка Катица Јанева била фотографирана од затворските простории, но фотографијата не докажува дека личноста е токму обвинителката.
„Поранешната главна обвинителка на Специјалното обвинителство, Катица Јанева, е фотографирана во затворот Шутка, каде што се наоѓа во притвор по одлука на Обвинителството за организиран криминал и корупција. Таа е фотографирана во дворот од затворот, додека разговара со друг затвореник“- се вели во текстот.
Грешките на авторот во овој напис:
- На дадената фотографија се гледа една жена свртена со грб, така што читателот не може да види јасно кое е лицето.
- Не се знае времето кога е направена фотографијата.
- Не се знае дали со сигурност се работи за затворот во Шутка или за некое слично место.
- Не се знае кој е авторот на фотографијата.
- Не е неведено зошто оваа информација би била значајна и зошто оваа фотографија како таква (дури и ако авторот докаже дека тоа е навистина Катица), би била вест.
Кога прашањето за верификација е оставено на читателите!
Фактот дека не е потврдено дали Катица Јанева е на оваа фотографија авторот на текстот решил да го стави во последниот ред на текстот. Намерно или ненамерно, авторот се чини дека сака да се ослободи од својата примарна одговорност – проверката и товарот да му ги препушти на читателот. За да има некаков материјал во овој напис, авторот остатокот од текстот го наполнил со стари изјави од директорот на затворот, со што прави забуна кај читателот.
За читателот: Земете ги со резерва нејасните фотографии
Имајте на ум дека вестите со фотографија понекогаш се помоќни и поекспресивни, како и поубедливи од тие што немаат фотографија. Но, ова се однесува само кога сликата навистина е направена на местото на настанот и текстот на новинарот излегува природно од фотографијата, а не спротивно кога текстот е „присилно“ приспособен на фотографијата. И кога сликата е јасна и добро се гледа што има во неа.
Што е најважно: анализирајте ја фотографијата од сите агли, дознајте дали новинарот го напишал изворот, т.е. времето кога е направена, авторот и точното место на фотографијата.
Поставете ги прашањата: каква новост носи оваа слика и зошто е важно да ја прочитате веста? Дали вреди да се прочита овој текст и што ќе научите како нова информација?
Ако овие елементи недостасуваат во текстот прикачен на фотографијата, многу е веројатно дека авторот ве манипулира.