Манипулативен и сензационалистички напис што се споделува на „Фејсбук“ дезинформира оти „Катимерини открил дека Мицотакис му поставил услови на Заев за ЕУ“. Но, никаде во текстот на „Екатимерини“, и во тој што е објавен на англиски јазик и во оригиналниот на грчки јазик, не се спомнуваат „четири кумулативни услови“. Ова е додадено во написот на „Експрес“, без притоа да има каква било потврда дека ова е вистина и како е донесен овој заклучок. Нема никакво дополнително објаснување ни за тоа кои се овие четири наводни услови
Текст со сензационалистички и ударен наслов кој тврди дека грчкиот премиер, Киријакос Мицотакис му поставил услови на македонскиот премиер, Зоран Заев за влез во ЕУ, ја манипулира јавноста. Написот е споделен и на социјалната мрежа „Фејсбук“ каде има добиено голема видливост.
Во објавениот напис, се цитира извештајот којшто го објавил грчкиот весник „Екатимерини“ за неодамнешната средба на грчкиот и македонскиот премиер во Атина. Но, во дел од написот се тврди нешто што не може да се најде во оригиналниот напис објавен од „Екатимерини“:
Македонските власти досега не открија дека Атина има четири кумулативни услови кои мора да се исполнат за безбеден пат до ЕУ за што е заинтересирана Атина.
Иако кога се чита целиот текст, се добива впечаток дека и овој пасус е дел од објавата на „Екатимерини“, тоа не е вистина. Ниту се поставени некакви четири кумулативни услови ниту „Екатимерини“ известува за такво нешто.
Никаде во текстот на „Екатимерини“, и тој што е објавен на англиски јазик и оригиналниот на грчки јазик, не се спомнуваат „четири кумулативни услови“. Ова е додадено во написот на „Експрес“, без притоа да има каква било потврда дека ова е вистина и како е донесен овој заклучок. Нема никакво дополнително објаснување ни за тоа кои се овие четири наводни услови.
Освен тоа и насловот е манипулативен и сензационалистички. Во него се тврди дека „Катимерини открил оти Мицотакис му поставил услови на Заев за ЕУ“. Такво нешто нема. Кога ќе го прочитате насловот на овој текст објавен на социјалните мрежи, прво нешто што ќе помислите дека има некакви конкретни услови досега непознати за јавноста. Тежина на насловот му додава и зборчето „открил“, како да се работи за нешто ново, а текстот нема никаква врска со какво било откривање.
Она, пак, што е познато во јавноста е дека Мицотакис на средбата побарал од Заев почитување на Договорот од Преспа и исполнување на неговите одредби. Нешто што беше јасно и досега и неколкупати споделено со јавноста. Не е ниту нешто ново ниту некое ново откритие на грчкиот весник.
Онлајн ресурсниот центар за медиумска писменост и критичко мислење „Критинк“ служи како јавна архива на едукативни и информативни содржини објавени од „Метаморфозис“ и од други проекти и организации, особено за членките на Мрежата за медиумска писменост. Овој напис е првобитно објавен од сервисот за проверка на факти „Вистиномер“ и е преземен со дозвола на издавачот под условите на лиценцата Криејтив комонс–наведи извор-без изведени дела.