Оваа објава се повикува на антиваксерот Виктор Колман и ја дезинформира јавноста дека вакцинираните ќе почнат да умираат наесен, како и дека се заштитени само од првичната мутација на корона-вирусот. Наспроти дезинформациите на Колман, според Центарот за контрола и превенција на болести од САД (ЦДЦ), ковид-вакцините се безбедни и ефикасни и може да го спречат ширењето на корона-вирусот. Истовремено се наведува дека тие што се вакцинирани, дури и да се заразат со корона-вирусот, нема да имаат тешка клиничка слика и нема да бидат хоспитализирани во толку голем обем, споредено со проблемите со кои би се соочиле кога не би биле вакцинирани. Исто така, се посочува дека самите вакцини не можат никого да разболат од ковид-19
Рецензираме пост на „Фејсбук“, објавен во групата Последните времиња, во кој што се изнесени низа дезинформации од антивакцинална природа. Постот му е атрибуиран на извесен доктор, Вернон Колман, којшто според изнесеното изјавил дека „сите вакцинирани ќе почнат да умираат наесен!“.
Во постот уште и се додава (атрибуирано на Колман), дека:
Секоја вакцинирана личност има потенцијал да стане масовен убиец, бидејќи нивното тело станува лабораторија за производство на смртоносни вируси и дека некои од вакцинираните лица можат да станат асимптоматски носители – ширејќи смртоносни вируси околу нив.
Авторот додава дека луѓето „што примиле вакцина нема да можат да одговорат на мутациите на вирусот, затоа што нивниот имунолошки систем е поддржан од вештачки систем на одбрана, кој е дизајниран само да се бори против оригиналната форма на ковид 19“.
Во постот дополнително се тврди дека вакцинираните се осудени на смрт и оти ќе почнат да умираат наесен.
Лицето Вернон Колман, од 2016 година не е доктор. „Википедија“ му ја дава непрестижната титула на теоретичар на заговори од Англија, антиваксер, човек кој негира дека постои СИДА, блогер и автор на книги поврзани со човековото здравје, политиката и прашања за животните.
Медицинските тврдења на Колман се широко дискредитирани и опишани како псевдонаучни. Тој работел како лекар во минатото, но во март 2016 година не ја обновил лиценцата. Во 1981 година, одделот за здравство и социјално осигурување го казнил, зашто не сакал да му ја испише дијагнозата на свој пациент, со образложение дека тоа е нарушување на приватноста на пациентот.
Наспроти дезинформациите на Колман пренесени во постот, Центарот за контрола и превенција на болести вели дека ковид вакцините се безбедни и ефикасни и може да го спречат ширењето на корона-вирусот. Истовремено се наведува дека тие што се вакцинирани, дури и да се заразат со коронавирусот, нема да имаат тешка клиничка слика и нема да бидат хоспитализирани во толку голем обем, споредено доколку не би биле вакцинирани. Исто така, се посочува дека самите вакцини не можат никого да разболат од ковид-19.
Масовната вакцинација може да спречи нови мутации
Не е точно дека секоја личност има потенцијал да стане лабораторија за нови вируси и потенцијален убиец. Токму обратното е точно.
Имено, варијантите на вирусите не се појавуваат поради тоа што луѓето се вакцинираат. Масовната вакцинација може да ги спречи варијантите. Наспроти тврдењето на Колман дека со вакцинацијата се учат вирусите како да мутираат и да станат посилни и посмртоносни, корона-вирусите мутираат често и тоа е нивната дневна рутина, укажува шпанскиот советодавен комитет за вакцинација.
Малдита Сиенсија Пепе Алками, вирусолог од Здравствениот институт „Карлос Трети“, вели дека:
Вакцините не предизвикуваат вирусот да мутира повеќе. Тие имаат константна стапка за мутација, без разлика на тоа дали популацијата е вакцинирана или невакцинирана.
Всушност, британската, бразилската и јужноафриканската варијанта на корона-вирусот се појавија пред да почне масовната вакцинација!
Според Алками, она што се случува е фактот што некои варијанти на корона-вирусот може да им избегаат на вакцините. Тој го објаснува ова со примерот кога вакцината крева барикада на патот и прави да биде тешко вирусот да помине. Соочени со оваа блокада некои вируси продолжуваат да патуваат надвор од патот. Вирусологот додава дека кога вирусите се реплицираат и кога се шират многу, најверојатно ќе мутираат. Според него, најкритично за развивање нова мутација на вирусот ќе биде кога половина од луѓето ќе бидат вакцинирани, а другата половина не. Но, кога 85 проценти од населението ќе бидат вакцинирани, ќе биде многу тешко за вирусот да генерира варијанти за да ѝ избега на вакцината, зашто ќе треба да се реплицира многу, за да пронајде варијанта на отпорност на вакцината.
Алками смета дека за да се одбегне првото сценарио, треба да се вакцинира целата популација што побрзо и да се контролира вирусот со превентивни мерки.
Професорот по имунологија на Универзитетот „Виго“ вели дека варијантите се појавуваат со инфекциите и што поголем број луѓе се инфицирани, толку е поверојатно дека ќе има нови и нови мутации на корона-вирусот. Вакцините, според него, ќе заштитат против развојот на мутации и нови варијанти и поради тоа е потребно за што пократко време да се вакцинираат што поголем број граѓани.
Алками, исто така, го демантира изнесеното во тврдењето на Колман дека тие што се вакцинирани се единствено заштитени од првичната форма на корона-вирусот а не од мутациите. Според Алками, има две линии на одбрана против вирусот, првата линија се клетките природни убијци на вирусот, а потоа има и втора линија на одбрана, која ја претставувааат антителата и клетките што го препознаваат и уништуваат вирусот. Според вирусологот, вториот систем е помоќен, поспецифичен и ефективен, но му треба време да го проучи вирусот. Овој систем единствено е специфичен на вирусот што го предизвикува и не функционира против други вируси и ги уништува само инфицираните клетки, а не и другите клетки во организмот.
Да се тврди дека сите вакцинирани против ковид ќе почнат да умираат наесен, освен што е нелогично да се помисли, е и опасно, затоа што оние што ќе поверуваат во оваа лага, непоткрепена со ниту еден медицински аргумент, нема да се вакцинираат и нема да се достигне процентот на вакцинирани потребен да се создаде колективен имунитет. А колективен имунитет е неопходен за да се спречи вирусот да се шири од човек на човек.
Исто така, сите вакцини се ефикасни и штитат од делта-сојот, за којшто постојат предупредувања од СЗО дека ќе стане доминантен наредните месеци.
Поради сите изложени факти, постот што се повикува на антиваксерот и теоретичар на заговор Виктор Колман, во кој се тврди дека вакцинираните ќе почнат да умираат наесен и дека се заштитени само од првичната мутација на корона-вирусот, го оценуваме како дезинформација.
Онлајн ресурсниот центар за медиумска писменост и критичко мислење „Критинк“ служи како јавна архива на едукативни и информативни содржини објавени од „Метаморфозис“ и од други проекти и организации, особено за членките на Мрежата за медиумска писменост. Овој напис е првобитно објавен од сервисот за проверка на факти „Вистиномер“ и е преземен со дозвола на издавачот под условите на лиценцата Криејтив комонс–наведи извор-без изведени дела.