Organizata Botërore e Shëndetësisë nuk e ka ndryshuar qëndrimin e saj ndaj maskave, siç pretendon në mënyrë të gabuar ky postim në Facebook. OBSH vazhdon t’i rekomandojë ato si një nga mbrojtjet themelore kundër transmetimit të koronavirusit. Artikulli i lidhur me postimin i referohet një lajmi të botuar në CNN saktësisht një vit më parë – më 31 mars 2020. Përhapja e lajmeve të tilla dezinformuese dhe “bajate” për një vit mund të mashtrojë publikun dhe kështu të dëmtojë shëndetin e përgjithshëm publik.
Postimi në Facebook përhap dezinformata se Organizata Botërore e Shëndetësisë (OBSH) ka ndryshuar qëndrimin e saj ndaj maskave dhe mbajtjes së tyre gjatë pandemisë Covid-19. Informacioni është i pasaktë, dmth është një vit i vjetër dhe OBSH ende rekomandon mbajtjen e maskave për t’u mbrojtur nga përhapja e virusit.
Postimi që po recensojmë përcjell një artikull me titull: “Kthim tronditës në qëndrimin e OBSH-së: NJERËZIT E SHËNDETSHËM NUK DUHET TË MBAJNË MASKA – CNN TV”.
Njerëzit e shëndetshëm nuk duhet të mbajnë maska, përsëri apelojnë nga Organizata Botërore e Shëndetësisë, duke theksuar se ato janë të nevojshme vetëm për ata që janë të infektuar me koronavirus ose për njerëzit që kujdesen për pacientët, thuhet në fillim të tekstit.
Artikulli më poshtë i referohet një deklarate nga Drejtori i Menaxhimit të Emergjencave të CNN, Majkëll Rajan.
CNN citon Drejtorin e OBSH-së për Menaxhimin e Emergjencave Majkëll Rajan, të ketë thënë se nuk ka prova konkrete që sugjerojnë se mbajtja e maskave ka përfitime të mundshme. Në të njëjtën kohë, ai tregon se përdorimi jo i duhur i maskave mund të bëjë vetëm më shumë dëm sesa dobi në luftimin e përhapjes së virusit. Rajan thotë se sipas Organizatës Botërore të Shëndetësisë, maskat janë vetëm për të sëmurët dhe punonjësit e shëndetit.
Në fund, artikulli konkludon se “OBSH qëndrim të tillë kishte edhe në fillim të pandemisë, i cili më vonë u ndryshua dhe maskat u bënë të detyrueshme“.
Teksti gjithashtu ofron një link me postimin e CNN që e transmeton atë. Por, kur të hapni tekstin e CNN, do të shihni se është lajm i vjetër, nga 31 marsi 2020. Lajmet nga viti i kaluar transmetohen në të njëjtën datë vetëm një vit më vonë dhe kështu krijojnë konfuzion te lexuesit.
I njëjti lajm u shfaq edhe në janar 2021 dhe ai u demaskua nga faqet botërore të kontrollit të fakteve si Politfact, Reuters dhe USA Today.
Uebfaqja e OBSH-së, e përditësuar për herë të fundit më 1 dhjetor të vitit të kaluar, ofron udhëzime se kur, ku dhe pse njerëzit duhet të mbajnë maska dhe të njëjtat përshkruhen “masë kryesore për të luftuar transmetimin dhe për të shpëtuar jetë”.
OBSH rekomandon maska mjekësore për punonjësit e kujdesit shëndetësor në mjediset klinike, për këdo që ndihet keq, për njerëzit që presin rezultatet e testit Covid-19, për njerëzit që kujdesen për dikë me rast të konfirmuar ose të dyshuar për Covid-19, për njerëzit që janë mbi 60 vjeç dhe të moshuarit me sëmundje kronike. Për të gjithë të tjerët në publikun e gjerë, maskat jo-mjekësorë në fytyrë janë në rregull, përfundon OBSH.
OBSH-ja gjithashtu ka faqe në internet të mbushur me tekst gjithëpërfshirës dhe udhëzime me video, se si të rrisni efektivitetin e maskave të fytyrës.
Disa vende evropiane, të tilla si Gjermania dhe Austria, nga frika e përhapjes së llojit britanik të koronavirusit, kohët e fundit e kanë bërë të detyrueshme mbajtjen e maskave FFP2, pasi ato janë më shumë se 90 përqind efektive. Me këtë rast, Maria van Krekov, epidemiolog i OBSH-së, deklaroi:
Nga të dhënat e mbledhura deri më tani nga vendet ku është regjistruar një lloj i ri i koronavirusit, nuk ka asnjë ndryshim në mënyrat e transmetimit. Nëse marrim informacione të ndryshme, ne patjetër do të rishikojmë rekomandimin për maskat. Çdo vend ka të drejtë të vendosë për maskat në një mënyrë që i përshtatet atij.
Nga e gjithë kjo mund të konstatohet se OBSH nuk e ka ndryshuar qëndrimin e saj në lidhje me maskat, dmth ende i rekomandon ato si një nga mbrojtjet themelore kundër transmetimit të koronavirusit. Përhapja e një dezinformimi dhe lajmi të tillë të vjetër një vit, mund të mashtrojë publikun dhe kështu të dëmtojë shëndetin e përgjithshëm publik.
Qendra e resurseve në internet për shkathtësi mediatike dhe mendim kritik “Crithink” shërben si një arkivë publike e përmbajtjeve edukative dhe informuese të botuar nga “Metamorphosis” dhe nga projekte dhe organizata tjera, veçanërisht për anëtarët e Rrjetit për shkathtësi meidatike. Ky artikull u botua fillimisht nga shërbimi për verifikimin e fakteve “Vërtetmatësi” dhe është marrë me lejen e botuesit sipas kushteve të licencës Creative Commons – thekso burimin – pa intervenuar.