Бомбастичното тврдење кое е предмет на оваа проверка на факти (копија на објавата), дека пијалакот „кока-кола“ бил позитивен на брзиот антигенски тест за коронавирусот, всушност, не е вистинита.
Станува збор за експеримент што го спроведе австриски политичар Михаел Шнедлиц (Michael Schnedlitz), кој од говорница во Парламентот сакал да ја докаже наводната бескорисност на антигенските тестови што се спроведуваат со примерок од носот или од грлото. Меѓутоа, наместо со примерок од носот или од грлото, тој тестот го спроведе така што го натопи тестот во чаша полна со „кока-кола“.
Видеото од оваа ситуација, објавено на 10 декември 2020 година, може да го погледнете на Фејсбук-страницата на Шнедлиц.
Потоа и медиуми на македонски јазик ја презедоа оваа информација некритички, односно без проверка зошто тестот покажал позитивен резултат. Што, всушност, се случи и дали навистина тестираната „кока-кола“ била позитивна на коронавирусот?
Се разбира дека не.
Компанијата „Диалаб“, откако пратеникот го декларира нивниот тест како бескорисен, се огласи со свое објаснување, кое што покажува дека не само што „кока-кола“ не е позитивна на тест за ковид-19 туку и дека самиот начин на кој што политичарот го извел паушалното тестирање е неправилен и поради тоа е дојдено до резултати кои се неточни.
Од компанијата „Диалаб“, производител на антигенскиот тест користен во видеото, посочија:
Има злоупотреба во начинот на спроведување на тестот. Прво, примерокот не беше аплициран во бафер што ја одржува Ph-вредноста константна. Да се аплицира „кока-кола“, која што има Ph-вредност од 2.5, како што тоа го направи политичарот, без користење на баферот, значи да се уништи протеинот на антителата на тестот. Ова ја уништува заштитната обвивка на тестот и го прави видлив позитивниот маркер. Овој резултат би бил очекуван и за кој било друг тест од друг производител, доколку тестот се спроведе без употреба на бафер. Ако тестот беше спроведен како што треба, на правилен начин, тој би дал негативен резултат. За да го докажеме тоа, ние точно го спроведовме истиот експеримент со „кока-кола“. Резултатот е негативен, како што можете да видите во видеото. Ваквите тестови секогаш треба да се спроведуваат од страна на болнички кадар или тренирани индивидуи за да се одбегнат вакви резултати и интерпретации.
„Диалаб“ додадоа дека дури и тест за бременост би излегол позитивен ако примерокот се тестира на вака неправилен начин.
Правилниот начин на тестирање е прикажан на ова видео, како поткрепа од „Диалаб“ за нивното тврдење. Резултатот од тестираната „кока-кола“, ако во експериментот се користи бафер, е негативен.
Баферот, како чекор што се користи при спроведувањето на антигенските тестови, е опишан во сите упатства на сите производители на антигенски тестови како задолжителен. Причината е во тоа што оваа супстанција ја одржува нормалата на Ph-вредноста на примерокот. Обидот да се обезвреднат антигенските тестови на начин што на нив се користат супстанции за кои што тестовите не се воопшто наменети, покажуваат само една работа. А тоа е дека, тестот не е наменет за храна и пијалaци, туку за примероци [to се тестираат за присуство на антигени на корона-вирусот, кои се човечки примероци. Освен тоа, брзите антигенски тестови не се користат за детекција на случаите што се позитивни на корона-вирусот. Дури и тестот да е позитивен, ако е антигенски, потоа мора да се провери со златниот стандард, ПЦР-тестот.
Оттука, комплетно невистинито е дека „кока-кола“ воопшто може да биде позитивна на антигенски тест за ковид-19, затоа што тестирањето во конкретниот случај што го рецензираме е спроведено од страна на лице кое не е медицинско, во услови во кои што е прескокнат важен чекор во тестот, кој доведе до лажно позитивен резултат со цел да се дезавуира јавноста и да се наметне сомнеж дека антигенските тестови се безвредни, бескорисни и дека даваат погрешни резултати.
Точноста на ова тврдење ја имаат проверено следните сервиси за проверка на факти:
- Вистиномер (Северна Македонија): Кока Кола не дава позитивен резултат на антигенски тест за ковид-19
- DPA FactChecking (Австрија): Cola zerstört Proteine auf Antigentest, Versuch zeigt kein gültiges positives Ergebnis
- APF Sprawdzam (Полска): Eksperyment austriackiego polityka nie jest dowodem o nieprzydatności testów na Covid-19
Онлајн ресурсниот центар за медиумска писменост и критичко мислење „Критинк“ служи како јавна архива на едукативни и информативни содржини објавени од „Метаморфозис“ и од други проекти и организации, особено за членките на Мрежата за медиумска писменост. Овој напис е првобитно објавен од сервисот за проверка на факти „Вистиномер“ и е преземен со дозвола на издавачот под условите на лиценцата Криејтив комонс–наведи извор-без изведени дела.