Бројот на новозаболените сега не е поголем отколку минатата година во истото време. Ако се споредат двата периода се доаѓа до заклучок дека оваа година имало речиси двојно помал број новозаразени на речиси четирипати поголем број тестирања
Преку фејсбук-објава се тврди дека во истиот период минатата година имало помал број новозаболени со корона-вирусот отколку сега. Ова не е вистина.
Објавата се состои од фотоисечок од медиумски напис на порталот „Инфомакс“ со наслов: „Повеќе новозаразени отколку лани ова време“. Притоа, во објавата се прави инсинуација дека за ова се виновни вакцините.
А разликата што е ? Па вакцинираните. Допрва следи ужасот во наредните месеци. Само за секој починат и хоспитализиран не заборавајте да прашате дали е ВАКЦИНИРАН.
Но, што вели фактичката состојба?
Бројот на новозаразени сега не е поголем отколку минатата година во истото време. Написот е објавен на 31 јули. Состојбата на 31 јули 2020 година односно мината година била 139 нови случаи на ковид-19 од направени 1377 тестирања. Состојбата на 31 јули 2021 година (оваа година), е 81 случај од 5315 тестирања. Ако се споредат двата периода се доаѓа до заклучок дека оваа година имало речиси двојно помал број новозаразени на речиси четирипати поголем број тестирања.
Овие информации се достапни во Министерството за здравство каде што се прави пресек на состојбата со корона-вирусот на секои 24 часа. Податоците потврдуваат дека целосно е погрешен заклучокот оти има поголем број новозаразени отколку минатата година и со тоа се наведува јавноста да донесе погрешни заклучоци.
Освен што реалните бројки не се совпаѓаат со тоа што се вели во објавата, неточно се тврди и дека за бројот на новозаразените се виновни вакцините, а дека вакцината е зараза сметаат и дел од корисниците на социјалните мрежи што оставиле коментари под објавата.
Фактите говорат дека иако тече процесот на вакцинација, не е имунизирано целото население, ниту, пак, има колективен имунитет. Од Министерството за здравство информираат дека заклучно со 1 август, со една доза вакцина против ковид-19 се вакцинирани 31 отсто од населението над 18-годишна возраст. Кај лицата над 50-годишна возраст опфатот со една доза изнесува 50,6 отсто, кај лицата над 60-годишна возраст опфатот со една доза изнесува 61,2 отсто, додека кај лицата над 70 години изнесува 64,9 отсто.
Ова значи дека и во следниот период ќе има новозаболени од вирусот, особено затоа што во земјава е присутен и делта-сојот, кој е позаразен и побрзо се шири. Освен тоа, може да се зарази и некој што е целосно имунизиран со две дози вакцина затоа што вакцините не штитат 100 отсто од заразување, туку процентот на нивната ефикасност значи заштита од развивање тешки форми на болеста, хоспитализација и смртност.
Но, бројката на новозаразените никако не може да ѝ се препише на вакцината. Не е точно дека преку вакцините се шири вирусот. На веб-страницата на УНИЦЕФ во делот со одговори на најчестите прашања за вакцините против корона-вирусот се вели дека ниедна од сегашните вакцини не содржи жив вирус што предизвикува ковид-19. Ова значи дека вакцината не може да нè разболи со ковид-19. Лесните симптоми пријавени од вакцинирани лица (болка, црвенило на кожата на местото на инјектирање, главоболка и покачена температура) се само доказ дека се активирал вашиот имунолошки систем. Ова го потврдува и американскиот Центар за контрола и спречување на болести (ЦДЦ).
И во текстот на „Инфомакс“, кој во постот е споделен само како фотографија и без линк до него, се вели дека каде што вирусот вртоглаво коси со нови случаи најмногу страдаат невакцинираните. Никаде во написот не се тврди дека вакцините се виновни за бројот на заразените, за да може да се извлече таков заклучок во фејсбук-објавата.
Преку лажно претставување на лесно проверливи бројки и невистинити тврдења дека вакцините го предизвикуваат вирусот, се манипулира јавноста со цел да се откаже од процесот на вакцинација. Оваа објава е дел од поширока антиваксерска кампања, која се заснова на неточни информации и паушални тврдења.
Онлајн ресурсниот центар за медиумска писменост и критичко мислење „Критинк“ служи како јавна архива на едукативни и информативни содржини објавени од „Метаморфозис“ и од други проекти и организации, особено за членките на Мрежата за медиумска писменост. Овој напис е првобитно објавен од сервисот за проверка на факти „Вистиномер“ и е преземен со дозвола на издавачот под условите на лиценцата Криејтив комонс–наведи извор-без изведени дела.