Кога медиумите зборуваат за вредноста на пари и споменуваат куфери, соодветно е да се истакнат нивните извори или барем да се видат слики или снимки од куферите и парите. Сепак, во написот што го разгледавме ги нема ниту куферите, а ниту парите
Линк до оригиналниот напис: „(ФОТО) Изет Меџити се враќа од ОАЕ со два куфера со долари“ Izet Mexhiti kthehet nga Emiratet me dy valixhe me dollarë
Датум на објавување: 1.2.2020
Датум на рецензија: 6.2.2020
Рецензира: Фатбарда Цури
Наслов што манипулира со јавноста
Споменувањето на куферите и доларите во насловот секако е голема мамка што медиумот ја користел за да привлече читаност, што се случи и со нас.
„(ФОТО) Изет Меџити се враќа од ОАЕ со два куфера со долари”, се вели во насловот на текстот што го разгледуваме.
Но, иако насловот зборува многу и вели дека има и фотографија, во написот не се наоѓа ниту „К“ од куферите во насловот, а камоли доларите споменати во насловот. На пример, на фотографиите прикачени на статијата се гледа дека членот на ДУИ, Изет Меџити, кој е апострофиран во насловот и написот, седи со некои луѓе, а никаде не се забележуваат куферите и доларите.
Многу текст, а нема содржина
Најавата од насловот, иако има многу зборови во текстот, нема содржина, т.е. насловот не е потврден со релевантна информација или извор.
„Потпретседателот на ДУИ, Изет Меџити, престојува во Обединетите Арапски Емирати, каде што одржи разни состаноци со арапските донатори во пресрет на парламентарните избори на 12 април. Неофицијални информации велат дека Меџити заедно со Абдулкадер Мемеди, се разбира, по наредба на Али Ахмети, отпатуваа во Обединетите Арапски Емирати за да побараат средства од арапските шеици. Неофицијално се вели дека Изет Меџити од ДУИ, од средбите со шеиците собрал два куфера со долари за предизборната кампања на ДУИ“, стои во написот што го разгледуваме.
Од ова заклучуваме дека медиумот преку својот бомбастичен и сензационален наслов ја манипулира јавноста и ја дезинформира. Овој напис го крши Етичкиот кодекс на новинарите затоа што се објавени непроверени информации. Но, освен информациите, според Прирачникот на „Критинк“, морат да бидат проверени и фотографиите.
Оттаму, може да се заклучи дека медиумот го применил и концептот на манипулација „повик на можност“, преку што се создава тенденција да се верува дека можноста нешто да се случи е доказ оти ќе се случи. На пример, фактот дека Меџити се сретнал со шеиците, не значи дека тој отишол да собере средства за кампањата.
Станете медиумска лупа
Да се биде информиран не значи дека треба да ги земете сите информации здраво за готово. Денес, кога информациите се пренесуваат премногу брзо како резултат на зголемувањето на бројот на онлајн-медиуми што не се регулирани со закон, може да ве направат и вас актер во зголемувањето на дезинформациите. Значи, за да го спречите ова, можете и вие да бидете лупа со која информациите би биле филтрирани. И во зависност од тоа дали ќе најдете потврдени извори во одредени написи во медиумите, ќе решите дали ќе им поверувате и дали треба да им ги пренесете на другите.