Официјален извештај, со официјални бројки од официјален државен систем во САД за следење безбедност на вакцините упатува на толкување за многу голем број несакани ефекти од антиковид-вакцините. Но, не е баш сѐ така, зашто во објавата не е напоменато дека постои и Упатство за толкување на податоците од извештаите, во кое е јасно назначено дека не може да се земат како јасен доказ оти постои поврзаност на несаканата реакција и примената вакцина
Објава на профил на „Фејсбук“ сугерира дека во Соединетите Американски Држави постои многу голем број случаи на несакани ефекти од антиковид-вакцините, што е суптилна дезинформација поради испуштениот контекст.
Во објавата прецизно се наведуваат категории и бројки од официјална американска агенција:
Пријавени резултати од примените инјекции (не се вакцини!) во САД:
5.165 умрени
51.133 побарале помош на лекар
39.121 примени во Ургентен центар
17.619 примени на болничко лекување
1.565 добиле парализа на лицето
1.342 развиле аналфилаксија (тешки, потенцијално смртоносни алергиски реакции)
5.317 имаат други реакции опасни по живот
3.994 се хендикепирани/осакатени
1.872 добиле срцев удар
756 развиле срцеви заболувања
1.392 развиле тромбоцитопенија (згруТЧување на крвта)
571 случаи на спонтан абортус
13.574 случаи на други тешки алергиски реакции
Притоа, под објавата е даден линкот од страницата од каде се земени податоците. Станува збор за линк каде се објавни податоци од вкупниот број пријавени случаи (поврзани со вакцините против ковид), до 28 мај 2021 од ВАЕРС (Vaccine Adverse Event Reporting System) или Систем за пријавување несакани ефекти поврзани со вакцините.
ВАЕРС е дел од националниот систем за следење на безбедноста на вакцините во САД, кој е раководен од CDC и FDA, односно од Ценатарот за контрола и превенција на болести (ЦДЦ) и Администрацијата за храна и лекови (ФДА), кои се грижат на федерално ниво за сите прашања поврзани со спроведување и контрола на здравствените политики и состојби во САД.
Извештајот што може да се види од линкот ставен во објавата е вистинит и точен. На таа страница навистина може да се најдат сите овие податоци за починати, за лица што побарале помош од лекар, за оние што се соочиле со специфично згрутчување на крв (тромбоцитопенија), за спонтани абортуси, за алергиски реакции и други категории.
Недостасува Упатството на ВАЕРС
Но, она што не е наведено во објавата што ја рецензираме е податокот дека ВАЕРС има и Упатство за толкување на податоците што се објавуваат. Ова Упатство е јасно назначено на првата страница на ВАЕРС-сајтот и во него уште на почетокот се наведува:
При проценка на податоците од VAERS, важно е да се напомене дека за кој било пријавен настан, не е воспоставена никаква причинско-последична врска. Извештаите за каква било врска помеѓу вакцините и несаканите дејства (можни несакани ефекти) се водат во VAERS. Затоа, VAERS собира податоци за каков било несакан настан по вакцинирањето, било да е тоа случајно или навистина предизвикано од вакцина. Извештајот за несакан настан до ВАЕРС не е документација дека вакцината го предизвикала настанот.
Во посебен дел од Упатството се предупредува кога се толкуваат податоците, да се внимава на следните ограничености на системот:
Извештаите на VAERS може доброволно да ги достават сите, вклучително и давателите на здравствени услуги, пациентите или членовите на семејството. Извештаите се разликуваат по квалитет и комплетност. Тие честопати немаат детали, а понекогаш може да имаат информации што содржат грешки.
Според тоа, може да се констатира дека информациите во објавата што ја рецензираме може да доведе до дезинформација за несаканите ефекти од вакцините против ковид, токму поради недостиг на контекстот, т.е. важната информација од Упатството како да се толкуваат бројките од официјалниот редовен извештај на ВАЕРС.
Онлајн ресурсниот центар за медиумска писменост и критичко мислење „Критинк“ служи како јавна архива на едукативни и информативни содржини објавени од „Метаморфозис“ и од други проекти и организации, особено за членките на Мрежата за медиумска писменост. Овој напис е првобитно објавен од сервисот за проверка на факти „Вистиномер“ и е преземен со дозвола на издавачот под условите на лиценцата Криејтив комонс–наведи извор-без изведени дела.