[Рецензија: Катица Јанева во кома, неизвесно е дали ќе се извлече и со какви последици]
Манипулативен текст со наслов што ве наведува да помислите едно нешто, за откако ќе го прочитате текстот да сфатите дека суштината е сосема друга. Насловот ги преминал границите на умерена скокотливост и по потрага по што поголем број кликови станал во најмала рака невкусен.
Линк до оригиналниот напис: Катица Јанева во кома, неизвесно е дали ќе се извлече и со какви последици
Датум и време на објавување: 2.7.2019
Датум на рецензија: 5.7.2019
Рецензент: Симона Атанасова
Катица Јанева во кома, неизвесно е дали ќе се извлече и со какви последици
Текст со ваков наслов споделен на социјалните мрежи веднаш предизвикува заинтересираност, но и загриженост. На прв поглед, без да се прочита текстот, насловот ве наведува да помислите дека специјалната обвинителка Катица Јанева се соочува со сериозни здравствени проблеми. Тоа е доволно да се разгори љубопитноста на читателот да го кликне текстот.
Но, кога ќе се отвори и прочита текстот, станува јасно дека тоа што се соопштува во насловот всушност го нема во текстот.
А текстот всушност е колумна. Објавена на непознат портал од уште понепознат автор и преземена од други портали. На вев-страницата каде што е првично објавена колумната е потпишан Дедо Ѓоргија, под што стои забелешка од редакцијата дека „името на авторот на овој текст ѝ е познато на редакцијата“. Тоа значи дека авторот може да е кој било, дури и некој што не е релевантен и компетентен.
Текстот, во медиумот што го презел, „залутал“ во погрешна категорија, односно во категоријата вести, каде што се објавуваат официјални информации, извештаи и новости, наместо во категоријата колумни, каде што се објавуваат лични ставови и видувања на одредени автори.
Поделбата на категории во медиумите не е случајна. Со тоа суштински се разграничува содржината на објавените написи. Во категоријата вести во никој случај не смеат да се најдат лични ставови и коментари. Во спротивно, се прави спинување и манипулација на читателот да мисли дека чита вест, а всушност чита нечиј коментар, кој може и да е целосно неточен и тенденциозен.
Иако е колумна, сепак, нивото на напишаното е ниско. Нафрлени се обвинувања без никакви конкретни докази. Обвинителките од СЈО се ословуваат како „Ката“ и „Фата“, а СЈО се нарекува „циркус“, што е непримерно.
ЛАЖНА ВЕСТ И СПИН
Во текстот се провлекуваат една лажна вест и еден спин.
Лажна вест е дека:
ВМРО-ДПМНЕ е политичка партија на која граѓаните Ѝ дадоа најголема поддршка на минатите избори.
Резултатите од изборите покажуваат дека ова е целосно неточно. Последните избори беа претседателските оваа година, на која ВМРО-ДПМНЕ освоија 377.446 гласови, а СДСМ 435.656 гласови. Пред претседателските беа локалните избори во 2017 година, на која ВМРО-ДПМНЕ убедливо изгуби од СДСМ, освојувајќи само 5 општини, во споредба со СДСМ, која победи во 57.
Спин е дека:
На последните анкети на јавното мислење на оваа партија (ВМРО-ДПМНЕ) Ѝ даваат повторно најголема доверба.
Во текстот не е наведно за која анкета станува збор, кој ја објавил и колкава е таа „најголема доверба“. Единствена релеавантна анкета објавена по претседателските избори е анкетата на М-проспект, според која навистина ВМРО-ДПМНЕ има најголема доверба. Проблематичен во текстот е зборот повторно, кој алудира дека партијата ВМРО-ДПМНЕ добивала најголема доверба и на претходните анкети, но на последните анкети пред претседателските избори, најголема доверба кај населението уживаше СДСМ.
Пропагандистички и тенденциозен текст полн со невистини, објавен преку превезот на колумна со цел неосновано критикување, спинување и манипулирање на јавноста. Текстот прекршува редица новинарски правила објавени во новинарскиот кодекс за професионални новинари.