Постот шири невистини дека вакцините содржат графен оксид и дека се генетска терапија. Графен оксид не е во листата на состојки и нема никаква можност да биде присутен во вакцината, изјавил Ален Мајерсон, професор по хемиски инженеринг во Институтот за технологија од Масачусетс. Според експертот за вакцини, Пол Офит, од детската болница во Филаделфија, тврдењето дека вакцините содржат графен оксид е чиста глупост. Исто така, вакцините против ковид не се генетска терапија, бидејќи тие не се дизајнирани за да ги променат гените. Центарот за контрола и превенција на болести на САД официјално потврдува дека вакцината против ковид не влегува во интеракција со нашата ДНК на каков било начин
Со почетокот на вакцинацијата против ковид-19, фокусот на дезинформации се премести од самата болест на конкретниот состав на вакцините и нивните перформанси. Таков е и овој пост објавен на „Фејсбук“, во кој се тврди дека 99 проценти од составот на вакцината (не се прецизира за која вакцина и од кој производител станува збор), е графен оксид. Исто така, се тврди дека вакцината е „генетска“.
И двете тврдења се неточни, а образложението ви го презентираме во продолжение.
Прво, графен оксидот не е во листата со состојки во вакцината против ковид.
Бидејќи главната компанија што е обвинувана неосновано и небазирано на ниеден хемиски или медицински доказ, дека во вакцините има графен оксид, е „Фајзер“, оттаму се огласија и официјално ја демантираа дезинформацијата.
Претставник на „Фајзер“ за „Асошиејтед прес“ ијзавил дека во нивната вакцина нема графен оксид. Студијата со која се прави обид да се „поткрепи“ тврдењето дека во вакцината „Фајзер“ има графен оксид, не е прегледана од медицинската заедница (не е peer-reviewed), ниту, пак, е поддржана од Универзитетот Алмерија во Шпанија.
Кит Лонгли, менаџер за наука во „Фајзер“, за „Асошиејтед прес“ изјавил дека оваа состојка во нивната вакцина не постои. Истото го потврдиле и хемиски и медицински експерти, кои не се поврзани со компанијата „Фајзер“.
Не е во листата со состојки, и нема никаква можност да биде присутна во вакцината, изјавил Ален Мајерсон, професор по хемиски инженеринг во Институтот за технологија од Масачусетс.
Доктор Амеш Адаџа, специјалист за инфективни болести од „Џонс Хопкинс“, тврди дека имало истражувања за потенцијалното користење на графен оксидот во други вакцини, но количините не биле во доволно големи дози за да предизвикаат токсичен ефект.
Експертот за вакцини, Пол Офит, од детската болница во Филаделфија, додал дека ова тврдење (дека вакцините содржат графен оксид) е чиста глупост.
Ковид-вакцините не се генетска терапија
Во врска со тврдењето дека вакцината е генетска, од досега презентираните официјални факти, познато е дека вакцините против ковид не се генетска терапија затоа што не се дизајнирани на ниеден начин да ги променат вашите гени.
Американската национална библиотека за медицина терминот генетска терапија го дефинира како техника што може да им дозволи на лекарите да третираат состојба со вметнување ген во клетките на пациентот, наместо да користат медикамент или операција. На пример, докторите со генска терапија можат да вметнат или да заменат мутиран ген, кој не функционира на соодветен начин или да стават нов ген во телото којшто ќе направи нешто за да се бори против болест.
ДНК и РНК не е исто
Генот се состои од ДНК и служи како базична физичка и функционална наследна единица. МРНК, пак, е различна од ДНК! РНК значи рибонуклеинска киселина. ДНК е дезоксирибонуклеинска киселина и служи како библиотека за инструкции за производство на протеини. Кога клетката сака да продуцира протеин, ја користи ДНК за да продуцира копија од МРНК. ДНК е во јадрото на клетките. Рибозомите не се. Поради тоа, МРНК од ковид-вакцината нема да влезе во јадрото на клетката, туку едноставно ќе оди во рибозомите, кои ќе го продуцираат спајк-протеинот.
Значи, влезот на МРНК во човековите клетки не ја менува ДНК на човековата клетка и доколку овие клетки се множат, МРНК нема да се инкорпорира во генетските информации на новите клетки.
Понатаму, генската терапија вклучува правење намерни промени во ДНК на пациентот за да се излекува генетска состојба. МРНК од вакцината не влегува во нуклеусот на клетката и воопшто нема интеракција со ДНК, така што не претставува генетска терапија.
Генетските терапии може да имаат долгорочни ефекти зашто перманентно ја менуваат ДНК на клетката. Спротивно на ова, МРНК клетките се секогаш транзиторни и не се наследени од ќерките клетки, што ги прави идеални за користење во вакцините, што, всушност, се прави.
И Центарот за контрола и превенција на болести на САД, официјално потврдува дека вакцината против ковид не влегува во интеракција со нашата ДНК на каков било начин:
мРНК никогаш не влегува во јадрото на клетката каде што се чува генетскиот материјал. Клетката го разградува и се ослободува од мРНК веднаш по завршувањето на користењето на инструкциите.
Поради гореизнесените аргументи, постот го оценуваме како невистинит. Вакцините не се генетска терапија и вакцината против ковид не содржи графен оксид.
Онлајн ресурсниот центар за медиумска писменост и критичко мислење „Критинк“ служи како јавна архива на едукативни и информативни содржини објавени од „Метаморфозис“ и од други проекти и организации, особено за членките на Мрежата за медиумска писменост. Овој напис е првобитно објавен од сервисот за проверка на факти „Вистиномер“ и е преземен со дозвола на издавачот под условите на лиценцата Криејтив комонс–наведи извор-без изведени дела.