Тврдењето во постот дека македонските власти за посредник при набавка на вакцината „Спутник V“ именувале Србин кој живее во Швајцарија и кој има полициско досие во Србија, е невистинито. Ова беше демантирано и од руската амбасада во Скопје и од Министерството за здравство, од каде што нагласуваат дека набавката на вакцината се одвива во директна комуникација со Рускиот инвестициски фонд во Москва
Објава на социјалната мрежа „Фејсбук“ ја дезинформира јавноста за тоа како македонските власти ја набавиле руската вакцина „Спутник V“. Во постот се тврди дека „Владата во Скопје молчи за најновиот потенцијален скандал“, а во поткрепа на ова е линкуван текст со наслов: „Македонија чека вакцини од швајцарски Србин со полициско досие“.
Но, ваквото тврдење искажано во насловот и во постот не е точно. Истото беше деманатирано од два извора – од Министерството за здравство и од руската амбасада во Република Северна Македонија.
Написот, повикувајќи се на телевизијата „Ал Џeзира Балканс“ наведува дека
Македонските власти за посредник при набавка на руските вакцини го именувале Никола Лакушиќ, Србин кој живее во Швајцарија и кој има полициско досие во Република Србија.
Текстот пренесува и дека Лакушиќ за телевизијата изјавил оти има договор со рускиот инвестициски фонд со кој гарантира испорака на вакцината „Спутник V“ за Македонија, БиХ, Алжир и Бугарија.
И само врз основа на објавата на „Ал Џезира“, без никаква друга проверка, текстот тврди дека личност со криминално досие во Србија е посредник во набавката на „Спутник“ за Македонија. Потоа истата (дез)информација ја шири и на социјалната мрежа „Фејсбук“ со назнака дека властите „молчат за најновиот потенцијален скандал“.
Набрзо по ваквите објави Министерството за здравство во соопштение до јавноста информира дека набавката на вакцината „Спутник V“ од самиот почеток се одвива во директна комуникација со Рускиот инвестициски фонд во Москва и нема никаков посредник во комуникацијата.
Министерството за здравство во целост ги демантира лагите и дезинформациите објавени на неколку медиуми дека Република Северна Македонија преку „посредник – српски државјанин“, ја набавила вакцината против ковид-19, Спутник V производство на рускиот Центар „Гамалеја, се вели во демантот од Министерството за здравство.
Оттаму наведуваат дека првите 3.000 дози вакцини пристигнаа веднаш откако Министерството го потпиша договорот за набавка на 200.000 вакцини од проиводителот на вакцината „Спутник V“. Министерството за здравство вели дека нема провизии за ниту една набавка на вакцини против ковид-19.
За набавка на вакцини против Ковид 19, без разлика дали станува збор за Спутник V, Синофарм, Астра Зенека или Фајзер, или Ковакс механизмот, нашата држава ја плаќа цената на вакцината понудена од производителот. Министерството за здравство уште еднаш потенцира дека нема провизии за ниту една набавка на вакцини против ковид-19. Ваквите лажни вести имаат за цел намерно да го нарушат процесот на набавки на вакцини. Министеретсвото за здравство ја цени и поддржува слободата на медиумите, истражувачкото и критичко новинарство, но укажуваме информациите до кои доаѓаат медиумите сериозно да ги проверуваат, како би се избегнало ширење на лажни вести, велат од Министерството.
И руската амбасада во Македонија ја демантира веста дека вакцината „Спутник V“ во земјава пристигнува преку посредник:
Амбасадата не ги коментира изјавите на поединечни лица, без оглед на тоа колку се фантастични. Во исто време, Имајќи ја предвид посебната важност на ова прашање за граѓаните на Северна Македонија, овој пат ќе направиме единствен исклучок – немаше и нема да има никакви посредници во набавката на вакцини за РСМ: Сите преговори се водеа директно помеѓу Рускиот фонд за директни инвестиции и Министерството за здравство, и токму на овој начин беа постигнати конечни договори, велат од руската амбасада во Македонија за ТВ „Сител“.
Имајќи ги предвид демантите од Министерството за здравство и од Руската амбасада, тврдењето искажано во постот што го рецензираме: „Македонија чека вакцини од швајцарски Србин со полициско досие“, го оценуваме како невистинито.
Онлајн ресурсниот центар за медиумска писменост и критичко мислење „Критинк“ служи како јавна архива на едукативни и информативни содржини објавени од „Метаморфозис“ и од други проекти и организации, особено за членките на Мрежата за медиумска писменост. Овој напис е првобитно објавен од сервисот за проверка на факти „Вистиномер“ и е преземен со дозвола на издавачот под условите на лиценцата Криејтив комонс–наведи извор-без изведени дела.